स्वातंत्र्यदिनानिमित्त अमृतवाहिनी सह. बँकेचे एटीएम सेंटर ग्राहकांच्या सेवेसाठी सुरू

या एटीएम सेंटरच्या उद्घाटनप्रसंगी माजीमंत्री बाळासाहेब थोरात म्हणाले की, अमृतवाहिनी बँकेने सर्वसामान्य नागरिकांना अत्यंत चांगली सुविधा दिली असून राज्य पातळीवर आपला लौकिक निर्माण केला आहे. बँकेने गेल्या दीड वर्षापासून डिजिटल क्रांती करून बँकेला एक आधुनिक स्वरूप प्राप्त करून दिले आहे. यामध्ये  सर्व संचालक मंडळ आणि स्टाफ यांचे योगदानाचे त्यांनी कौतुक केले तसेच अमृतवाहिनी शेती व शिक्षण विकास संस्था येथे शिकणारे विद्यार्थी, तेथील कर्मचारी, सहकारमहर्षी भाऊसाहेब थोरात सहकारी साखर कारखान्यामधील कर्मचारी, शेतकरी, राजहंस दूध संघाचे सर्व कर्मचारी तसेच डेंटल कॉलेजचे सर्व स्टाफ आणि विद्यार्थी यांच्या सोयीसाठी हे एटीएम सेंटर खूप उपयोगी पडणार आहे. बँकेने 1000 कोटी पेक्षा जास्त व्यवसाय करताना ग्राहकांच्या हिताला नेहमीच प्राधान्य दिले असल्याचे त्यांनी म्हटले आहे.

याप्रसंगी बोलताना बँकेचे चेअरमन सुधाकर जोशी यांनी बँकेचे मोबाईल ॲप, क्यू आर कोड, फोन पे,गुगल पे तसेच एटीएम कार्ड हे सर्व डिजिटल प्रॉडक्ट बँकेने सुरू केले असून गेल्या वर्षभरामध्ये ग्राहकांची कुठलीही तक्रार या सेवेबद्दल बँकेत प्राप्त झालेली नाही असे सांगितले. बँकेचे डिजिटलायजेशन करत असताना बँकेच्या डाटाच्या सुरक्षेवर बँकेने विशेष लक्ष दिलेले असून त्यासाठी आवश्यक ती सर्व पावले उचललेली आहेत असे ते म्हणाले.

कार्यक्रमाचे प्रास्ताविक बँकेचे मुख्य कार्यकारी अधिकारी सुशील गुजराथी यांनी केले तर सर्व उपस्थितितांचे आभार बँकेचे व्हॉइस चेअरमन ॲड.नानासाहेब शिंदे यांनी केले. यावेळी बँकेचे सर्व अधिकारी कर्मचारी मोठ्या संख्येने उपस्थित होते.