वैजापूर रस्त्याला धोकादायक खड्ड्यांमुळे अपघातांचे प्रमाण वाढले; तातडीने दुरुस्ती करावी – स्नेहलताताई कोल्हे 

कोल्हे यांनी सार्वजनिक बांधकाम विभागाच्या कार्यकारी अभियंता, संगमनेर कार्यालयास लेखी निवेदनाद्वारे ही मागणी केली. त्यांनी सांगितले की, सदर रस्ता हा अत्यंत महत्वाचा असून त्यावरून रोज हजारो वाहनांची रहदारी होते. शाळा-महाविद्यालयातील विद्यार्थी, नोकरीसाठी प्रवास करणारे कामगार, दुध उत्पादक शेतकरी तसेच सर्वसामान्य नागरिक यांचा या रस्त्यावरून मोठ्या प्रमाणावर वावर असतो. मात्र स्पीड ब्रेकरलगत पडलेल्या खड्ड्यांत पावसाळ्यात मोठ्या प्रमाणात पाणी साचत असल्याने दुचाकी व चारचाकी वाहनधारकांना अपघातांचा धोका निर्माण होतो. गेल्या काही दिवसांत येथे अनेक वाहनचालक जखमी झाले असून नागरिकांच्या सुरक्षिततेचा प्रश्न निर्माण झाला आहे.

स्पीड ब्रेकरच खाचखळग्यासारखा झाला असून तोही अपघातास कारणीभूत ठरत आहे. त्यामुळे या ठिकाणाची तातडीने दुरुस्ती करून रस्ता सुरळीत करावा. प्रशासनाने तात्काळ लक्ष घालून नागरिकांना दिलासा द्यावा, अन्यथा मोठी दुर्घटना घडू शकते, असा इशाराही स्नेहलताताई कोल्हे यांनी दिला आहे.