वन विभागाकडून जवळे कडलग येथील बिबट्याला ठार मारण्याचे आदेश
बिबट्यांपासून रक्षण करण्याकरता शासनाने प्रभावी उपाययोजना करावी – मा.मंत्री बाळासाहेब थोरात
अंगणामध्ये खेळत असताना चार वर्षाचा सिद्धेश सुरज कडलग याच्यावर दबा धरून बसलेल्या बिबट्याने हल्ला केला आणि यामध्ये चिमुकल्या सिद्धेशचा जीव गेला यानंतर जवळेकडलग येथील ग्रामस्थ व नातेवाईक यांनी तीव्र संताप व्यक्त केला. याचबरोबर संगमनेर तालुक्यामध्ये मोठी संतापाची लाट निर्माण झाली. सर्व ग्रामस्थांनी ग्रामीण रुग्णालय व पोलीस स्टेशनवर धाव घेऊन तीव्र निषेध व्यक्त केला. या ठिकाणी युवक काँग्रेसच्या अध्यक्षा डॉ. जयश्रीताई थोरात यांनीही उपस्थित राहून तीव्र घटनेचा संताप व्यक्त केला याचबरोबर वन विभागाने बिबट्यांबाबत कायमस्वरूपी ठोस उपाययोजना करावी अशी मागणी केली.
ही घटना समजतात महाराष्ट्राचे वरिष्ठ नेते बाळासाहेब थोरात यांनी वनमंत्री गणेश नाईक यांना फोन लावून सदर घटनेची माहिती दिली. याचबरोबर संगमनेर तालुक्यामध्ये बिबट्यांची संख्या वाढली असून यावर तातडीने प्रभावी उपाययोजना करावी अशी मागणी केली. याचबरोबर नरभक्षक बिबट्याला ठार मारण्याची मागणी केली. वनमंत्री गणेश नाईक यांच्या चर्चेनंतर लोकनेते बाळासाहेब थोरात यांनी वर विभागाचे अप्पर मुख्य सचिव मिलिंद म्हैसकर यांच्याशी चर्चा केली.
यानंतर वन विभागाचे अप्पर मुख्य सचिव मिलिंद म्हैसकर यांनी घटनास्थळी उपस्थित असलेल्या डॉ.जयश्रीताई थोरात यांच्याशी फोनवरून चर्चा केली. याचबरोबर ग्रामीण पोलीस निरीक्षक प्रवीण साळुंखे यांच्यासोबतही चर्चा केली.
या घटनेनंतर वन विभागाने तातडीने मध्यरात्री जवळे कडलग येथील बिबट्याला मारण्याचे आदेश दिले असून संगमनेर तालुक्यासह सह्याद्रीच्या पायथ्याशी असलेल्या सर्व गावांमध्ये वाढलेल्या बिबट्याच्या संख्यांवर नियंत्रण करण्यासाठी वन विभागाकडून ठोस उपाय योजना राबविण्याची आश्वासन वनमंत्री गणेश नाईक यांनी दिले आहे.
