धारणगाव-माहेगाव देशमुख रस्ता सुधारणा कामाचे आ.आशुतोष काळे यांच्या हस्ते भूमिपूजन संपन्न

Kopargaon vijay kapse दि १७ सप्टेंबर २०२६– एमडीआर-८५ वरील धारणगाव-माहेगाव देशमुख या जवळपास ५ किलोमीटर रस्त्याच्या ४.२० कोटी निधीतून करण्यात येणाऱ्या सुधारणा कामाचे भूमिपूजन गुरुवार (दि.१७) रोजी आमदार आशुतोष काळे यांच्या हस्ते मोठ्या उत्साहात पार पडले.
यावेळी बोलतांना आ.आशुतोष काळे म्हणाले की, माजी आमदार अशोकराव काळे यांनी त्यांच्या कार्यकाळात गोदावरी नदीवर धारणगाव-कुंभारी येथे पूल बांधल्यापासून पश्चिम भाग कोपरगाव शहराला जोडला जावून राज्य मार्ग०७ लगत असलेल्या सुरेगाव-कोळपेवाडी-माहेगाव देशमुख-कुंभारी या (एमडीआर-८५) मार्गे मोठ्या प्रमाणात रहदारी वाढली असून त्याचा प्रत्यक्ष-अप्रत्यक्ष कोपरगाव शहराच्या बाजार पेठेवर सकारात्मक परिणाम होवून आर्थिक उलाढाल वाढली आहे.

सद्यस्थितीत एमडीआर-८५ वरील धारणगाव-माहेगाव देशमुख या जवळपास ५ किलोमीटर रस्त्याची दुरावस्था झाल्यामुळे त्याचा वाहनचालकांना व नागरीकांना मोठा त्रास सहन करावा लागत होता. त्यामुळे वाहनचालकांना व नागरीकांना होणारा त्रास कमी व्हावा यासाठी महायुती शासनाकडे पाठपुरावा करून या रस्त्याच्या सुधारणा करणे कामी ४.२० कोटी निधी मंजूर करून आणला असून त्या माध्यमातून होणाऱ्या सुधारणा कामातून अडचणी दूर होणार असल्याचे त्यांनी सांगितले. या ५ किमी रस्त्याच्या सुधारणेमुळे वाहतुकीच्या अडचणी सुटणार असून कुंभारी, धारणगाव, माहेगाव देशमुख, कोळपेवाडी व सुरेगाव आदी गावातील नागरीकांमध्ये समाधानाचे वातावरण पसरले आहे.

याप्रसंगी परमपूज्य श्री राघवेश्वरनंदगिरीजी महाराज, कर्मवीर शंकरराव काळे सहकारी साखर कारखान्याचे उपाध्यक्ष दिनार कुदळे, संचालक सूर्यभान कोळपे, प्रशांत घुले, विष्णु शिंदे,संभाजीराव काळे आदींसह धारणगाव, हिंगणी, कुंभारी, माहेगाव देशमुख व कोळपेवाडी आदी ग्रामपंचायतचे सरपंच, उपसरपंच, सदस्य व ग्रामस्थ मोठ्या संख्येने उपस्थित होते.