सिंह हा जंगलचा राजा तो सर्वांना सोबत घेऊन चालतो. टायगर हा स्वार्थी तो एकटाच चालतो – आमदार सत्यजित तांबे

संगमनेर सेवा समितीच्या वतीने नाशिक – पुणे रोडवर झालेल्या जाहीर सभेत आमदार सत्यजित तांबे यांनी नाव न घेता विरोधकांवर जोरदार हल्ला चढवला. यावेळी व्यासपीठावर लोकनेते बाळासाहेब थोरात, मा.आ.डॉ.सुधीर तांबे यांच्यासह सेवा समितीचे सर्व उमेदवार उपस्थित होते.

संगमनेर सेवा समितीच्या जाहीरनामा मांडताना पुढील पाच वर्षात करावयाचा नियोजनबद्ध विकास आराखडा सत्यजित तांबे यांनी मांडला. याचबरोबर हा माझा शब्द असून संगमनेरच्या विकासासाठी कधीही निधी कमी पडणार नाही कारण लोकनेते बाळासाहेब थोरात यांचा राज्यात होणारा आदर आणि त्यांचा मोठा वशिला आपल्याकडे आहे असे त्यांनी सांगितले.

याचबरोबर संगमनेर मध्ये काल एक जण येऊन गेला आणि टायगर आला असे म्हटले टायगर हा स्वार्थी असतो आणि तो एकटा येतो मात्र सिंह हा जंगलचा राजा असतो आणि तो सर्वांना सोबत घेऊन चालतो. राजकीय कार्यकर्त्यांनी करमणुकीचे भाषण करू नये तर विकासाच्या मुद्द्यावर बोलावे असा सल्लाही त्यांनी विरोधकांना दिला.

नवीन लोकप्रतिनिधी उपमुख्यमंत्री एकनाथ शिंदे यांच्या कानात काहीतरी सांगतात परंतु संगमनेर मध्ये आपण अनेक विकास कामे यापूर्वीच मंजूर करून घेतली आहे. एमआयडीसी करता एप्रिल 2025 मध्ये आपण पत्र दिले त्यावर 26 सप्टेंबर 2025 रोजी संबंधित विभागाचे पत्र मिळाले असून सर्वेचे काम सुरू आहे. संगमनेर शहरातील महिला हॉस्पिटल लोकनेते बाळासाहेब थोरात यांनी 28 जानेवारी 2020 म्हणजे 5 वर्षांपूर्वीच सर्व मंजूर करून ठेवले असल्याचे त्यांनी कागदपत्रांसह सांगितले. नवीन लोकप्रतिनिधीला विकास कामांबाबत काहीच माहिती नाही. अभ्यास नाही अशी टीका सुद्धा त्यांनी केली याचबरोबर उपमुख्यमंत्री एकनाथ शिंदे यांनी मला विकास कामासाठी 50 कोटी रुपयांचा निधी दिला असल्याचे सांगून त्यांच्या प्रति कायम आदर असल्याचे ते म्हणाले.