महिलांनी आर्थिक स्वावलंबी होवून कुटुंबाच्या आर्थिक उन्नतीत योगदान द्यावे  –  पुष्पाताई काळे

महिलांनी आर्थिक स्वावलंबी होवून कुटुंबाच्या आर्थिक उन्नतीत योगदान द्यावे  –  पुष्पाताई काळे

महिलांना ब्युटी पार्लर प्रशिक्षण प्रमाणपत्र आणि मेकअप मोफत कीटचे वाटप

Kopargaon vijay kapse दि २१ मे २०२६- आजच्या वाढत्या महागाईच्या काळात केवळ एका व्यक्तीच्या उत्पन्नावर कुटुंबाचा गाडा चालविणे कठीण झाले आहे. मुलांचे शिक्षण, कुटुंबाचा उदरनिर्वाह आणि भविष्यातील गरजा पूर्ण करतांना अनेक कुटुंबांना आर्थिक अडचणींचा सामना करावा लागतो. त्यामुळे महिलांनीही स्वावलंबी बनून कुटुंबाच्या आर्थिक उन्नतीत योगदान द्यावे असे प्रतिपादन प्रियदर्शनी इंदिरा महिला मंडळाच्या अध्यक्षा  पुष्पाताई काळे यांनी केले.

महिला व बालविकास विभाग जिल्हा परिषद अहिल्यानगर पंचायत समिती अंतर्गत ग्रामीण आदिवासी भागातील महिला व युवतींना व्यावसायिक व तांत्रिक प्रशिक्षण अंतर्गत कोपरगाव मतदार संघातील अनेक महिलांनी ब्युटी पार्लरचे प्रशिक्षण घेतले असून या महिलांना बुधवार (दि.२०) रोजी कोपरगाव येथे प्रियदर्शनी इंदिरा महिला मंडळाच्या अध्यक्षा व गौतम सहकारी बँकेच्या माजी संचालिका  पुष्पाताई काळे यांच्या हस्ते ब्युटी पार्लर प्रशिक्षण प्रमाणपत्र आणि मोफत मेकअप कीटचे वाटप करण्यात आले याप्रसंगी त्या बोलत होत्या.

पुढे बोलताना त्यांनी सांगितले कि, पती-पत्नी हे संसाररूपी रथाची दोन चाके असून दोघांनीही एकमेकांना साथ दिल्यास कुटुंब अधिक सक्षम होते. महिलांनी कौशल्याधारित प्रशिक्षण घेऊन स्वतःच्या पायावर उभे राहणे ही काळाची गरज आहे. अशा प्रशिक्षणांमुळे महिलांना रोजगाराच्या नवीन संधी उपलब्ध होत असून त्यांच्या आत्मविश्वासातही मोठी वाढ होत आहे.ग्रामीण भागातील महिलांनी केवळ चूल आणि मूल यामध्ये अडकून न पडता आत्मनिर्भर व स्वावलंबी बनावे आणि स्वतःच्या कौशल्याच्या जोरावर आर्थिक प्रगती साधावी यासाठी आ.आशुतोष काळे यांच्या सहकार्यातून प्रियदर्शनी इंदिरा महिला मंडळ सातत्याने विविध उपक्रम राबवीत आले आहे. यापूर्वी महिलांना नथ आणि ज्वेलरी तयार करण्याचे प्रशिक्षण देण्यात आले असून त्या प्रशिक्षणासाला महिलांकडून मोठा प्रतिसाद मिळाला होता. आजच्या काळात ब्युटीपार्लर हा महिलांसाठी एक भक्कम उत्पन्नाचा मार्ग बनू शकतो. कष्ट आणि जिद्द असेल तर यश नक्की मिळते कारण कष्टाला दुसरा कोणताही पर्याय नाही. पार्लर चालवताना केवळ एकाच गोष्टीवर अवलंबून न राहता त्यात ज्वेलरीचे विविध प्रकार आणि वेगवेगळे कपडे विक्रीसाठी ठेवून महिला आपले उत्पन्न अधिक वाढवू शकतात. या व्यवसाया संदर्भात महिलांना जी काही मदत लागेल ती सर्व मदत करायला आम्ही तयार आहोत. कच्चा माल खरेदी करण्यापासून ते तयार उत्पादनांच्या विक्रीपर्यंत सर्वोतोपरी मदत केली जाईल. पार्लर चालवतांना आपली संस्कृती जपण्याचे काम करा एखाद्या महिलेने पाश्चात्त्य किंवा वेगळी स्टाईल करायला सांगितली तर त्यांना ही स्टाईल आता जुनी झाल्याचे सांगून आपली संस्कृती आणि परंपरा जपण्याचा प्रयत्न करा असा मौलिक सल्ला त्यांनी यावेळी महिलांना दिला.

आपल्या मुलांना चांगले संस्कार आणि चांगले शिक्षण द्या. चांगला हिरा कुठेही चमकतो त्यासाठी मराठी किंवा इंग्रजी माध्यम महत्त्वाचे नसून उत्कृष्ट शिक्षक लाभले तर मुले नक्कीच चांगली घडतात. मराठी माध्यम आणि रयत शिक्षण संस्थेच्या शाळेत शिकणारे हजारो विद्यार्थी आज देश-विदेशात मोठे अधिकारी, डॉक्टर आणि इंजिनिअर झाले आहेत. त्यामुळे मातृभाषेतून घेतलेले शिक्षण कधीही वाया जात नाही. ज्या महिलांचे शिक्षण काही कारणास्तव अपूर्ण राहिले आहे,त्यांनी आपल्या मुलांसोबत आपले शिक्षण पूर्ण करावे. शिक्षणाचे वय कधीही संपत नाही त्यामुळे स्वतःला आयुष्यभर विद्यार्थी समजा आणि सतत नवीन गोष्टी शिकत राहून आपल्या पतीला संसारात खंबीर साथ द्या. आमदार आशुतोष काळे आणि सौ. चैतालीताई काळे यांच्या माध्यमातून मी तुम्हाला मदत करायला नेहमी तयार असल्याचे पुष्पाताई काळे यांनी यावेळी सांगितले. यावेळी धनसंपदा बहुउद्देशीय प्रतिष्ठानच्या अध्यक्षा  अनिता वहाडणे, नगरसेविका  माधवी वाकचौरे,  सोनल त्रिभुवन, माजी नगरसेविका वर्षा गंगुले आदी मान्यवरांसह प्रशिक्षणार्थी महिला मोठ्या संख्येने उपस्थित होत्या.