शेकडो विद्यार्थ्यांनी अभ्यासला संगमनेरचा समृद्ध सहकार

सहकारमहर्षी भाऊसाहेब थोरात सहकारी साखर कारखाना, राजहंस दूध संघ, अमृतवाहिनी बँक, शेतकी संघ या विविध सहकारी संस्थांना अमृतवाहिनी महाविद्यालयातील विविध विद्यार्थी 1200, श्रमिक महाविद्यालय 600, केटीएच महाविद्यालय नाशिक 200, यांच्यासह इतर 1200 संगमनेर तालुक्यातील विविध शालेय व महाविद्यालयीन विद्यार्थ्यांनी भेटी दिल्या.

काँग्रेस पक्षाचे वरिष्ठ नेते बाळासाहेब थोरात यांच्या नेतृत्वाखाली संगमनेरचा सहकार हा देशासाठी दिशादर्शक ठरला आहे. संगमनेर तालुक्यातील शेतकरी व सर्वसामान्य माणसाच्या जीवनात सहकारामुळे समृद्धी आली आहे. सहकारी संस्थांचा प्रत्येक कुटुंबाशी थेट संबंध असून शहरातील व्यापारी व बाजारपेठ यांच्याशी संबंध आहे. यामुळे ग्रामीण विकास, सहकार व बाजारपेठ ही विकासाची प्रक्रिया विद्यार्थ्यांनी प्रत्यक्ष अनुभवली. थोरात कारखान्याने कायम ऊसाला उच्चांकी भाव दिला असून संगमनेर तालुक्यात दररोज साधारण नऊ लाख लिटर दूध उत्पादन होत असून त्यामुळे लहान व गरीब शेतकऱ्यांच्या जीवनात झालेली प्रगती, संगमनेर तालुक्याचे सुसंस्कृत वातावरण, सामाजिक जीवन पद्धती, शैक्षणिक अनुकूलता, समृद्ध बाजारपेठ सातत्याने विकासातून राबवलेल्या विविध योजना यामुळे संगमनेर तालुका हा राज्यातील प्रगत तालुका म्हणून ओळखला जातो. या प्रगतीमध्ये सहकाराचा मोठा वाटा असून नव्या पिढीला सहकार चळवळ प्रत्यक्ष अनुभवावी या उद्देशाने या विद्यार्थ्यांनी सर्व संस्थांना भेटी दिल्या.

या भेटीदरम्यान थोरात कारखान्यामधील साखरेची संपूर्ण निर्मिती प्रक्रिया प्रत्यक्ष पाहण्याची संधी विद्यार्थ्यांना मिळावी. उसापासून साखर तयार होईपर्यंतचा संपूर्ण प्रवास त्यांनी बारकाईने समजावून घेतला याचबरोबर. को -जनरेशन या प्लांटलाही भेट दिली. दररोज होणारी विद्युत निर्मिती तिचा वापर आणि इथेनॉल प्रकल्प या विविध प्रकल्पांना भेट देऊन कारखाना कामकाजाची माहिती विद्यार्थ्यांनी घेतली.

तर राजहंस दूधसंघामध्ये गावपातळीवरील दूध सोसायटी मधून आलेल्या दुधावर विविध प्रक्रिया ते पॅकिंग प्रक्रिया याचबरोबर विविध उपपदार्थांची निर्मिती,प्रक्रिया विद्यार्थ्यांनी अभ्यासली. तर सहकारी चळवळीला बळकटी देण्याबरोबर शेतकरी आणि गोरगरीब नागरिकांना आर्थिक मदतीतून स्थैर्य देणाऱ्या अमृतवाहिनी बँकेच्या कामकाजाची पाहणी ही सर्व विद्यार्थ्यांनी केली.

विद्यार्थ्यांनी मोठ्या उत्साहाने आणि मनापासून सर्व प्रक्रियांचे निरीक्षण केले. कॅन्सरतज्ञ डॉ.जयश्रीताई थोरात यांच्या संकल्पनेतून होत असलेल्या अशा अभ्यास दौऱ्यांमुळे विद्यार्थ्यांना पुस्तकी ज्ञानाबरोबरच उद्योग, सहकार आणि समाज रचना यांची प्रत्यक्ष ओळख झाली असून विद्यार्थ्यांच्या व्यक्तिमत्त्वासाठी व भविष्यातील करिअरसाठी अत्यंत महत्त्वाची ठरणारी असल्याचे श्रमिक महाविद्यालयाचे प्रा.आप्पासाहेब थिटमे यांनी म्हटले आहे.

तर डॉ.जयश्रीताई थोरात यांच्यामुळे आम्हाला संगमनेर तालुक्यातील सर्वात मोठा असा समृद्ध सहकार अभ्यासण्याची मोठी संधी मिळाली आहे. आमचे महाविद्यालय व कारखाना दूध संघ व्यवस्थापनाची आम्ही सर्व विद्यार्थी आभारी असल्याचे डी.फार्मसी महाविद्यालयाची विद्यार्थिनी तनुजा सोनवणे हिने म्हटले आहे.