अमृतवाहिनीत रविवारी संगमनेर फुटबॉल फिव्हर २०२६ चे आयोजन
Sangmner vijay kapse दि १९ जुन २०२६–जगात सर्वाधिक देशांमध्ये खेळल्या जाणारा व सर्वाधिक लोकप्रिय असलेल्या फुटबॉल खेळाची संस्कृती संगमनेर मध्ये विकसित व्हावी याकरता महाराष्ट्राचे वरिष्ठ नेते बाळासाहेब थोरात यांच्या संकल्पनेतून रविवार दिनांक 21 जून 2026 रोजी दुपारी 4.30 वा. अमृतवाहिनीतील नव्या स्टेडियम मध्ये भव्य फुटबॉल मॅचसह फुटबॉल फिव्हर 2026 चे आयोजन करण्यात आले असल्याची माहिती मुख्य कार्यकारी अधिकारी अनिल शिंदे यांनी दिली आहे.
याचबरोबर सध्या सुरू असलेल्या फिफा वर्ल्डकपच्या सामन्यांचे निवडक क्षणचित्रे भव्य चाळीस फुटी स्क्रीनवर अनुभवण्याची संधी सर्व उपस्थित प्रेक्षकांना मिळणार आहे. यामध्ये जागतिक फुटबॉल मधील सर्वाधिक लोकप्रिय खेळाडू मेस्सी, रोनाल्डोनो,एबांम्बे, लुकाको यांच्यासह अर्जेंटिना, ब्राझील, पोर्तुगाल, फ्रान्स, इंग्लंड यामधील काही सामन्यांचे क्षणचित्र व आतापर्यंत झालेल्या सर्व फुटबॉल सामन्यांच्या उद्घाटनाचे क्षणचित्र प्रेक्षकांना पाहायला मिळणार आहे. प्रेक्षकांचा जल्लोष आणि फुटबॉलचा उत्साह ही सर्व नागरिकांसाठी मोठी आनंद पर्वणी असणार आहे.
या सामन्यासाठी मा. महसूल व शिक्षण मंत्री लोकनेते बाळासाहेब थोरात, मा. आ.डॉ सुधीर तांबे, आमदार सत्यजित तांबे, संस्थेच्या कार्यकारी विश्वस्त शरयूताई देशमुख, सौ दुर्गाताई तांबे, युवक काँग्रेसच्या तालुकाध्यक्ष डॉ. जयश्रीताई थोरात, इंद्रजीतभाऊ थोरात, लक्ष्मणराव कुटे, विलासराव वर्पे यांच्यासह अमृत उद्योग समूहातील व संगमनेर तालुक्यातील विविध संस्थांचे पदाधिकारी शिक्षण संस्थांचे, पदाधिकारी, सर्व प्राचार्य मुख्याध्यापक क्रीडाशिक्षक यांच्यासह पालक व विद्यार्थी मोठ्या संख्येने उपस्थित राहणार आहेत.
तरी या फुटबॉल फिव्हर 2026 च्या कार्यक्रमासाठी संगमनेर तालुक्यातील सर्व क्रीडाप्रेमी फुटबॉल प्रेमी युवक नागरिक महिला युवती यांनी मोठ्या संख्येने उपस्थित राहावे असे आवाहन अमृतवाहिनी शेती व शिक्षण संस्थेच्या वतीने करण्यात आले आहे.
