सह्याद्री संस्थेतील आजी – माजी सेवकांच्या स्नेह मेळाव्याचे आयोजन
संगमनेर विजय कापसे दि १ फेब्रुवारी २०२५– संगमनेर तालुक्यातील गुणवत्तेच्या बाबतीत नामवंत शैक्षणिक संस्था म्हणून ओळख असणाऱ्या सह्याद्री बहुजन विद्या प्रसारक समाज संस्थेमध्ये कार्यरत असणाऱ्या सेवकांचा व यापूर्वी सेवानिवृत्त झालेल्या सेवकांचा स्नेह मेळावा 5 फेब्रुवारी 2025 रोजी दुपारी 4.30 वा. भाऊसाहेब संतुजी थोरात महाविद्यालयाच्या प्रांगणात आयोजित केला असल्याची माहिती संस्थेचे चेअरमन माजी आमदार डॉ. सुधीरजी तांबे यांनी दिली.
सह्याद्री संस्थेमध्ये 20000 विद्यार्थी शिक्षण घेत आहेत. संस्थेच्या प्रगतीत शिक्षकांचा मोठा वाटा असल्याचे डॉ. सुधीर तांबे यांनी सांगितले. सदर स्नेह मेळावा संस्थेचे मार्गदर्शक माजी महसूल मंत्री आदरणीय बाळासाहेब थोरात यांच्या प्रमुख उपस्थिती मध्ये, डॉ. सुधीर तांबे यांच्या अध्यक्षतेखाली व आमदार सत्यजित तांबे यांच्या प्रमुख उपस्थितीत आयोजित केल्याची माहिती संस्थेचे रजिस्ट्रार विशिष्ट आचार्य बी. आर. गवांदे सर यांनी दिली. या प्रसंगी जेष्ठ साहित्यिक व व्याख्याते डॉ. संजय कळमकर यांचे व्याख्यान आयोजित केले आहे.
हा स्नेहमेळावा यशस्वी करण्यासाठी संस्थेचे सेक्रेटरी लक्ष्मणराव कुटे, सहसेक्रेटरी दत्तात्रय चासकर, खजिनदार तुळशीनाथ भोर यांचे बरोबर सर्व संचालक प्रयत्न करत आहेत.
