दिवाळी हाट’मुळे महिला उद्योजिकांच्या व्यवसायाला भरारी; तीन दिवसांत झाली लाखोंची उलाढाल
Kopargaon vijay kapse दि २८ ऑक्टोबर २०२६ :- दिवाळीच्या खरेदीच्या निमित्ताने महिला बचत गट, गृहउद्योग करणाऱ्या महिला आणि स्थानिक व्यावसायिकांना हक्काची बाजारपेठ उपलब्ध करून देणाऱ्या प्रियदर्शनी इंदिरा महिला मंडळाच्या ‘दिवाळी हाट’ खरेदी महोत्सवाला कोपरगावकरांनी भरघोस प्रतिसाद दिला. तीन दिवसांत लाखोंची उलाढाल झाल्याने महिला उद्योजिकांना आर्थिक उत्पन्नाची संधी मिळाली, तर स्थानिक बाजारपेठेलाही चालना मिळाली. माजी आमदार अशोकराव काळे यांच्या मार्गदर्शनाखाली आयोजित करण्यात आलेल्या या ‘दिवाळी हाट’ खरेदी महोत्सवात कोपरगाव तालुक्यासह ग्रामीण व शहरी भागातील महिलांनी सहभाग नोंदवत आपली उत्पादने विक्रीसाठी आणली होती. घरगुती वस्तू, दिवाळीचे फराळाचे पदार्थ आणि विविध उत्पादनांची विक्री येथे करण्यात आली. दर्जेदार, स्वदेशी आणि रास्त दरातील वस्तू एकाच ठिकाणी उपलब्ध झाल्याने नागरिकांना खरेदीची चांगली संधी मिळाली.
‘दिवाळी हाट’मुळे तीन दिवसांत वर्षभराच्या नफ्याइतके उत्पन्न मिळण्याची संधी; आमच्या व्यवसायाला हक्काची बाजारपेठ मिळाली अशा शब्दात महिला विक्रेत्यांनी आपल्या भावना व्यक्त केल्या.आमच्यासारख्या छोट्या व्यावसायिक महिलांसाठी ‘दिवाळी हाट’ म्हणजे केवळ स्टॉल लावण्याची संधी नसून व्यवसायाला नवी दिशा देणारे हक्काचे व्यासपीठ आहे. वर्षभर मेहनत करून जेवढा नफा मिळतो, तेवढा नफा या तीन दिवसांत मिळत असल्याचा अनुभव काही महिलांनी व्यक्त केला. ग्राहकांपर्यंत थेट पोहोचता येते, उत्पादनांची ओळख निर्माण होते आणि पुढील काळातही खरेदी करणारे ग्राहक जोडले जातात. कोणताही मार्केटिंग खर्च न करता एवढ्या मोठ्या बाजारपेठेत आपली उत्पादने विकण्याची संधी मिळणे आमच्यासाठी महत्त्वाचे आहे. महिला बचत गट आणि छोट्या व्यावसायिक महिलांना आर्थिकदृष्ट्या सक्षम होण्यासाठी अशी संधी उपलब्ध करून दिल्याबद्दल प्रियदर्शनी इंदिरा महिला मंडळाच्या अध्यक्षा पुष्पा काळे आणि चैताली काळे यांचे आभार मानले.
