डॉ सुजय विखे पाटील पोहोचले थेट भुईमुगाच्या शेतात

राहाता विजय कापसे दि २२ जुन २०२५– माजी खासदार डॉ सुजय विखे पाटील हे राहाता तालुक्याच्या दौऱ्यावर असताना रस्त्यालगत एक महिला शेतकरी भुईमुगाच्या शेंगा काढणीचे काम करीत होत्या. या महिलेने अतिशय साधेपणाने डॉ सुजय विखे पाटील यांना “या ना शेतात… थोड्या शेंगा खा!” म्हणून बोलावले असता डॉ विखे पाटील यांनी क्षणाचाही विचार न करता तिथेच आपली गाडी थांबवत त्यांच्याशी आपुलकीने संवाद साधत शेंगा खाण्याचा आनंद घेतला.

या विषयी डॉ विखे पाटील यांनी सांगितले की, त्यांच्या साधेपणात आणि स्वागतात असणारी आपुलकी यावेळी मनाला खूप भावली. शेतकऱ्यांचा आपल्याप्रती असणारा स्नेह आणि जिव्हाळा पाहून खूप भारावून गेलो. दरम्यान शेतात गेलो, जमिनीवर बसलो, मातीचा गंध घेतला आणि माणुसकीच्या नात्याला पुन्हा एकदा नव्याने अर्थ दिला.