कोपरगाव बस आगारच्या वतीने  विद्यार्थ्यांना थेट शाळेत महाविद्यालयातच एसटी पासचे वाटप 

कोपरगाव विजय कापसे दि १९ जुन २०२४– ग्रामीण भागात उच्च शिक्षणाची सोय नसल्याने विद्यार्थ्यांना शिक्षणासाठी तालुक्याच्या गावी ये जा करण्यासाठी एसटी महामंडळाकडून विद्यार्थ्यांना मासिक भाड्याच्या तुलनेत ३३% टक्के रक्कम भरून सवलतीच्या दरात बस पास मिळत असतो परंतु हा पास मिळवण्यासाठी विद्यार्थ्यांना शालेय महाविद्यालयीन तासिका बुडवून तासनतास एस टी डेपो कार्यालयात रांगेत उभे राहावे लागते. त्यामुळे विद्यार्थ्यांचे शैक्षणिक व वेळेचे नुकसान होते. यापासून सुटका मिळावी या उद्देशाने राज्य शासनाच्या मार्गदर्शनाखाली महाराष्ट्र राज्य मार्ग परिवहन मंडळांने यंदाच्या शैक्षणिक वर्षापासून विद्यार्थ्यांना थेट शाळेत महाविद्यालयातच सवलतीच्या दरात बस पास वाटप करण्यात येणार आहे.

याच पार्श्वभूमीवर अहमदनगर जिल्ह्यातील कोपरगाव राज्य परिवहन आगारातर्फे देखील मंगळवार दिनांक १८ जून पासून कोपरगाव तालुक्यातील वेगवेगळ्या महाविद्यालय शाळेमध्ये शिक्षणासाठी ग्रामीण भागातून बस ने प्रवास करणाऱ्या विद्यार्थ्यांना सवलतीच्या दरात बस पास वाटप सुरू करण्यात आले असून यासाठी कोपरगाव आगार प्रमुख अमोल बनकर यांच्या नेतृत्वाखाली कोपरगाव बस आगार कर्मचाऱ्यांनी नुकतीच तालुक्यातील श्री संत गंगागिरी महाराज महाविद्यालय,के जे सोमय्या महाविद्यालय तसेच कोळपेवाडी येथील राधाबाई काळे कन्या विद्या मंदिर आदी शाळा महाविद्यालयात प्रत्यक्षात भेट देत तेथील एसटी बसने येजा करणाऱ्या विद्यार्थ्यांना सवलतीच्या दरात जागेवरच सर्व कागदपत्रांची पूर्तता करत  बस पासचे वाटप करण्यात आले.

या मोहिमेत कोपरगाव बस आगार प्रमुख अमोल बनकर,विभागीय कर्मचारी वर्ग अधिकारी तथा पालक अधिकारी कोपरगाव नितीन गटणे, स.वा अधीक्षक योगेश दिघे, वाहतूक नियंत्रक गौतम खरात, प्रकाश हिरे आदि कोपरगाव एसटी आगाराचे अधिकारी कर्मचाऱ्यांनी तालुक्यातील वेगवेगळ्या शाळेत महाविद्यालयात भेटी देत प्राचार्य, मुख्याध्यापक, शिक्षक विद्यार्थ्यांना शासनाच्या जागेवरच बस पास वितरित करण्याच्या मोहिमेविषयी मार्गदर्शन केले.