७ गावातील १० विकासकामांना १ कोटींचा निधी मंजूर-आ.आशुतोष काळे
Kopargaon vijay kapse दि ५ ऑक्टोबर २०२६–कोपरगाव विधानसभा मतदार संघाच्या ग्रामीण भागातील पायाभूत सुविधा निर्माण करण्यासाठी आमदार आशुतोष काळे यांनी केलेल्या सातत्यपूर्ण पाठपुराव्याला मोठे यश मिळाले आहे. त्यांच्या प्रयत्नातून जिल्हा वार्षिक योजना इतर मागास व बहुजन विकास विभागाअंतर्गत मतदार संघातील ७ गावांमधील १० विविध विकासकामांसाठी तब्बल १ कोटी रुपयांचा निधी मंजूर झाला आहे. यामुळे या गावांतील रस्ते, स्मशानभूमी व इतर मूलभूत सुविधांचा प्रश्न मार्गी लागणार असून नागरिकांना मोठा दिलासा मिळणार आहे.
कोपरगाव मतदार संघाच्या ग्रामीण भागातील इतर मागासवर्गीय वस्तीतील सर्वांगीण विकासाला चालना देवून नागरी सुविधा उपलब्ध करून देण्यासाठी आ.आशुतोष काळे सातत्याने शासनाकडे पाठपुरावा करीत आहेत. त्यांच्या प्रयत्नांतून करंजी बु., कान्हेगाव, कोळपेवाडी, बक्तरपूर, वारी, वेस आणि संवत्सर या सात गावांतील विकासकामांना निधी मंजूर झाला आहे.यामध्ये करंजी बु. येथे अनिल चरमळ घर ते भाऊसाहेब ढवळे घर तसेच श्री लक्ष्मीआई मंदिर कोल्हे घर ते भास्कर केरू वानले घर रस्ता; कान्हेगाव येथे स्मशानभूमीला तार कंपाउंड तसेच कान्हेगाव मंदिर ते स्मशानभूमी रस्ता; कोळपेवाडी येथे नवनाथ मोरे घर ते हौशीराम वाघडकर घर रस्ता; बक्तरपूर येथे ग्रा.मा. ०६ ते शरद गरुड घर तसेच शरद गरुड घर ते पाझर तलाव रस्ता; वारी येथे भाकरे घर ते रमाकांत टेके वस्ती रस्ता; वेस येथे नुराभाई सय्यद घर ते गोसावी भीमराज मळा तसेच प्रमोद गोसावी घर ते गाढवे वस्ती रस्ता आणि संवत्सर गावठाण येथे नेहे वस्ती ते सेंद्रे वस्ती रस्ता या विकासकामांचा समावेश आहे.
या निधीतून इतर मागासवर्गीय वस्तीत होणारे रस्ते व विकासकामांमुळे नागरिकांची होणारी गैरसोय दूर होणार आहे. अनेक वर्षांपासून प्रलंबित असलेल्या मूलभूत सुविधांच्या प्रश्नांना आता गती मिळणार असल्याने संबंधित गावांतील नागरिकांमध्ये समाधानाचे वातावरण निर्माण झाले आहे.या विकासकामांसाठी निधी उपलब्ध करून दिल्याबद्दल आ.आशुतोष काळे यांनी मुख्यमंत्री ना. देवेंद्र फडणवीस, उपमुख्यमंत्री ना.सुनेत्रा पवार, उपमुख्यमंत्री ना. एकनाथ शिंदे तसेच जलसंपदा व पालकमंत्री ना. राधाकृष्ण विखे पाटील यांचे आभार मानले आहेत. शासनाच्या माध्यमातून मतदारसंघातील ग्रामीण भागातील मूलभूत प्रश्न टप्प्याटप्प्याने मार्गी लावून नागरिकांना आवश्यक पायाभूत सुविधा उपलब्ध करून देण्यासाठी माझा पाठपुरावा यापुढेही सुरूच राहणार असल्याचे आ. आशुतोष काळे यांनी सांगितले आहे.
