प्रशिक्षणामुळे विद्यार्थ्यांच्या कौशल्यांना मिळाली नवी दिशा! के. बी. रोहमारे महाविद्यालयात प्रमाणपत्र वितरण सोहळा उत्साहात संपन्न

 प्रशिक्षणामुळे विद्यार्थ्यांच्या कौशल्यांना मिळाली नवी दिशा! के. बी. रोहमारे महाविद्यालयात प्रमाणपत्र वितरण सोहळा उत्साहात संपन्न

प्रशिक्षणामुळे विद्यार्थ्यांच्या कौशल्यांना मिळाली नवी दिशा! के. बी. रोहमारे महाविद्यालयात प्रमाणपत्र वितरण सोहळा उत्साहात संपन्न

Kopargaon vijay kapse दि ३ नोव्हेंबर २०२६-आजच्या स्पर्धात्मक आणि तंत्रज्ञानाधिष्ठित युगात केवळ पदवी किंवा पुस्तकी ज्ञान पुरेसे नसून विद्यार्थ्यांकडे व्यावसायिक कौशल्ये असणे ही काळाची गरज बनली आहे. विद्यार्थ्यांना रोजगाराच्या नव्या संधी उपलब्ध व्हाव्यात आणि त्यांना व्यावहारिक ज्ञानाची जोड मिळावी, या उद्देशाने SaiGen Education & Research Pvt. Ltd. आणि कोपरगाव तालुका एज्युकेशन सोसायटीचे के. बी. रोहमारे कला, वाणिज्य व विज्ञान कनिष्ठ महाविद्यालय, कोपरगाव यांच्या संयुक्त विद्यमाने आयोजित करण्यात आलेल्या ‘Tally Prime With GST Course’ या कौशल्याधिष्ठित प्रशिक्षण अभ्यासक्रमाचा प्रमाणपत्र वितरण सोहळा महाविद्यालयात उत्साहपूर्ण वातावरणात संपन्न झाला.
या प्रशिक्षण अभ्यासक्रमाच्या माध्यमातून विद्यार्थ्यांना आधुनिक संगणकीय लेखांकन प्रणालीचे प्रत्यक्ष ज्ञान देण्यात आले. यामध्ये Tally Prime सॉफ्टवेअरचा वापर, अकाउंटिंग एन्ट्रीज, लेजर तयार करणे, व्हाउचर एन्ट्री, GST बिलिंग, आर्थिक व्यवहारांची नोंद तसेच विविध आर्थिक अहवाल तयार करण्याचे प्रात्यक्षिकांसह प्रशिक्षण देण्यात आले. या प्रशिक्षणामुळे विद्यार्थ्यांना वाणिज्य शाखेतील सैद्धांतिक ज्ञानाचा प्रत्यक्ष व्यावसायिक क्षेत्रात उपयोग कसा करावा, याची जाणीव झाली.

कार्यक्रमाप्रसंगी प्रशिक्षण यशस्वीरीत्या पूर्ण केलेल्या विद्यार्थ्यांना मान्यवरांच्या हस्ते प्रमाणपत्रांचे वितरण करण्यात आले. प्रमाणपत्र प्राप्त झाल्यानंतर विद्यार्थ्यांच्या चेहऱ्यावर आनंद आणि आत्मविश्वासाचे वातावरण पाहायला मिळाले.
यावेळी कु. ईश्वरी देवकर हिने अभ्यासक्रमादरम्यान आलेले अनुभव उपस्थितांसमोर मनोगताद्वारे व्यक्त केले. या कोर्समधून मिळालेले व्यावहारिक ज्ञान, नवीन कौशल्ये आणि त्याचे भविष्यातील महत्त्व विशद करत तिने विद्यार्थ्यांनी अशा अभ्यासक्रमांमध्ये आवर्जून सहभागी व्हावे, असे आवाहन केले.

कार्यक्रमात SaiGen Education & Research Pvt. Ltd. चे संचालक ॲड. एस. पी. पुंड यांनी विद्यार्थ्यांना मार्गदर्शन करताना Tally Prime With GST या अभ्यासक्रमाचे भविष्यातील व्यावसायिक महत्त्व, रोजगाराच्या उपलब्ध संधी तसेच अकाउंटिंग आणि GST क्षेत्रातील वाढती गरज याविषयी सविस्तर माहिती दिली.
महाविद्यालयाचे सन्माननीय प्राचार्य डॉ. विजय ठाणगे यांनी आपल्या मनोगतातून भविष्यात वाणिज्य शाखेचे वाढते महत्त्व अधोरेखित केले. बदलत्या आर्थिक व व्यावसायिक परिस्थितीमध्ये वाणिज्य शाखेतील विद्यार्थ्यांनी आधुनिक तंत्रज्ञान आणि कौशल्याधारित शिक्षण आत्मसात करणे आवश्यक असल्याचे त्यांनी सांगितले. विद्यार्थ्यांना व्यावसायिक क्षेत्रात यशस्वी होण्यासाठी अशा प्रकारचे कौशल्याधिष्ठित उपक्रम महाविद्यालयात भविष्यातही आवर्जून राबविण्यात येतील, अशी ग्वाही त्यांनी दिली.
या कार्यक्रमाच्या यशस्वी आयोजनासाठी महाविद्यालयाचे उपप्राचार्य प्रा. बाळासाहेब सोनवणे, वाणिज्य विभागप्रमुख प्रा. गणेश जेजुरकर, विज्ञान विभागप्रमुख प्रा. श्रीमती सुनीता बालवे, तसेच महाविद्यालयातील सर्व प्राध्यापकवृंद व शिक्षकेतर कर्मचारी यांनी विशेष परिश्रम घेतले.
कार्यक्रमाचे सूत्रसंचालन प्रा. श्रीमती मयुरी भोसले व प्रा. श्रीमती ज्योती लोगाणी यांनी प्रभावीपणे केले, तर आभार प्रदर्शन प्रा. अभिजीत वाघ यांनी केले. विद्यार्थ्यांना गुणवत्तापूर्ण शिक्षणाबरोबरच रोजगाराभिमुख आणि व्यावसायिक कौशल्यांचे प्रशिक्षण देण्याच्या महाविद्यालयाच्या शैक्षणिक दृष्टिकोनातून हा उपक्रम अत्यंत महत्त्वपूर्ण ठरला. ‘पुस्तकी ज्ञानाला व्यावहारिक कौशल्यांची जोड आणि कौशल्यांना रोजगाराची संधी’ या उद्दिष्टाला मूर्त स्वरूप देणारा हा प्रमाणपत्र वितरण सोहळा विद्यार्थ्यांसाठी प्रेरणादायी ठरला.