केमिस्ट असोसिएशन आयोजित महारक्तदान शिबिरात १८७ दात्यांनी केले रक्तदान
कोपरगाव विजय कापसे दि २६ जानेवारी २०२५– अखिल भारतीय केमिस्ट असोसिएशनचे अध्यक्ष सबंध भारतभरातील केमिस्ट बांधवांचे श्रद्धास्थान असलेले जगन्नाथ उर्फ आप्पासाहेब शिंदे यांच्या ७५ वा वाढदिवस सबंध भारतातील केमिस्ट बांधव विविध विधायक उपक्रमाने साजरा करता असून यात प्रामुख्याने ७५ व्या अमृत महोत्सवी वाढदिवसा निमित्त एका दिवसात ७५ हजार रक्त पिशव्या संकलन करण्याचा विश्वविक्रम करण्याचा मानस समस्त केमिस्ट बांधवांनी हाती घेतला असून त्याच अनुषंगाने कोपरगाव तालुक्यातील केमिस्ट बांधवांनी देखील एकत्र येत शुक्रवार दि २४ जानेवारी रोजी कोपरगाव तालुक्यात वेगवेगळ्या ठिकाणी महारक्तदान शिबिराचे आयोजन करण्यात आले आहे यात १८७ दात्यांनी रक्तदान करत देश हितासाठी आपले अमूल्य असे योगदान दिले आहे.
या महारक्तदान शिबिराचे उदघाटन राष्ट्रसंत जगद्गुरु जनार्दन स्वामी मौनगिरीजी महाराज समाधी स्थान बेट कोपरगावचे मठाधिपती परमपूज्य रमेशगिरीजी महाराज यांच्या शुभहस्ते तर प्रसिद्ध आयुर्वेदाचार्य डॉ.रामदास आव्हाड, लायन्स क्लबचे डॉ. तुषार गलांडे यांच्या प्रमुख उपस्थितीत संपन्न होऊन कोपरगाव शहरातील व्यापारी धर्म शाळेत ११३ दात्यांनी, कोळपेवाडी येथील डॉ कोळपे इन्स्टिट्यूट ऑफ फार्मसी कॉलेज मध्ये ३५ दात्यांनी तर कोकमठाण येथील राष्ट्रसंत जनार्दन स्वामी कॉलेज २९ दात्यांनी रक्तदान केले.
या महारक्तदान शिबिरास अमृत संजीवनी चे चेअरमन पराग संधान, संतोष गंगवाल, विलास आवारे, शामसुंदर डागा, विजय जगताप, आप्पा नवले, कृष्णा आढाव आदी मान्यवरांनी भेटी देत केमिस्ट असोसिएशनच्या या अभिनव उपक्रमाचे कौतुक करत शुभेच्छा दिल्या.
