कोपरगाव विजय कापसे दि २३ मार्च २०२५:शहरातील संकल्प फाउंडेशन, डॉ. वाघडकर जनरल हॉस्पिटल व वृंदावन डायग्नोस्टिक सर्व्हिसेस यांच्या संयुक्त विद्यमाने पोलीस कर्मचारी व त्यांच्या कुटुंबीयांसाठी मोफत आरोग्य तपासणी शिबिर आयोजित करण्यात आले. “सुरक्षित समाजासाठी सक्षम पोलिस, आणि सक्षम पोलिसांसाठी उत्तम आरोग्य” हे ध्येय समोर ठेवून कोपरगाव शहर पोलीस ठाण्यात या शिबिराचे आयोजन करण्यात आले.
जाहिरात
या शिबिराचे उद्घाटन पोलीस सहाय्यक निरीक्षक किशोर पवार यांच्या हस्ते करण्यात आले. यावेळी डॉ. राजेंद्र वाघडकर, पोलीस उपनिरीक्षक भूषण हंडोरे, पोलीस उपनिरीक्षक दीपक रोठे, पोलीस उपनिरीक्षक कमलाकर चौधरी यांच्यासह पोलीस अधिकारी आणि कर्मचारी उपस्थित होते.जाहिरात
कार्यक्रमाची सुरुवात मान्यवरांच्या हस्ते दीपप्रज्वलन करून झाली. या शिबिरात बॉडी मास इंडेक्स (BMI), रक्त शर्करा प्रमाण, इलेक्ट्रोकार्डियोग्राम (ECG), फुफ्फुसाची कार्यक्षमता तपासणी यांसारख्या विविध तपासण्या करण्यात आल्या. याशिवाय, निरोगी जीवनशैली आणि संतुलित आहाराविषयी मार्गदर्शन देण्यात आले.जाहिरात
पोलीस कर्मचाऱ्यांसाठी मोफत आरोग्य शिबिर आयोजित केल्याबद्दल पोलीस प्रशासनाच्या वतीने सहाय्यक पोलीस निरीक्षक किशोर पवार यांनी डॉ. राजेंद्र वाघडकर यांचे आभार मानले. या कार्यक्रमाचे सूत्रसंचालन सुनील चव्हाण यांनी केले, तर आभार पोलीस कॉन्स्टेबल गणेश काकडे यांनी मानले.
