डोंगराळ घटनेचा कोपरगावात सकल सुवर्णकार समाजाच्या वतीने निषेध
कोपरगाव विजय कापसे दि १९ नोव्हेंबर २०२५-मालेगाव तालुक्यातील डोंगराळ येथील चिमुकलीवर अत्याचार करून निर्घृण हत्या केल्याची घटना नुकतीच घडल्याने सर्वत्र संतापाची लाट पसरली याच पार्श्वभूमीवर कोपरगावात देखील सकल सुवर्णकार समाजच्या वतीने एकत्र येत जाहीर निषेध करत तहसीलदार यांना निवेदन देण्यात आले.
सविस्तर वृत्त असे की, मालेगाव तालुक्यातील डोंगराळ गावात एका नराधम तरुणाने साडे तीन वर्षीय चिमुकलीवर अत्याचार करत तिचे दगडाने डोके ठेचून तिची अत्यंत निर्घृणपणे हत्या केल्याचे समोर आल्यानंतर सर्वत्र संतापाची लाट पसरली आहे. सदर घटनेतील नराधमाला तत्काळ कठोर शिक्षा व्हावी याकरिता या घटनेचा खटला फास्ट ट्रॅक कोर्टात चालवावा व त्याला सर्वांसमोर जाहीर रित्या फाशी द्यावी अशी मागणी कोपरगाव सकल सुवर्णकार समाजाच्या वतीने करण्यात आली आहे.तसेच निवेदन कोपरगावचे नायब तहसीलदार चंद्रशेखर कुलथे व शहर पोलीस निरीक्षक रामकृष्ण कुंभार यांना देत कोपरगावातील सर्व सराफ व सुवर्णकार व्यावसायिकांनी आपापले व्यवसाय बंद ठेवून या घटनेचा निषेध केला आहे.
