वीज ग्राहकांच्या परवानगी शिवाय स्मार्ट मीटर बसवू नका अन्यथा स्मार्ट मीटरची होळी करू; राष्ट्रवादीचा एल्गार

स्मार्ट मीटरमुळे गरिबांना वीज वापरणे देखील कठीण झाले असून बीज बिल भरायला थोडा जरी विलंब झाल्यास आपोआप वीज प्रवाह खंडित होतो. सर्व सामान्य आणि मोलमजुरी करणाऱ्या ग्राहकांकडे वेळेवर पैसे उपलब्ध नसतात त्यामुळे वीज बिल भरण्यात मागेपुढे होते व स्मार्ट मीटर असल्यामुळे तात्काळ घराची वीज खंडित होते. त्यामुळे विद्यार्थ्यांचे नुकसान होत आहे. कोपरगाव तालुक्यात दर दिवशी तासंतास आणि दुरुस्तीच्या नावाखाली दर शनिवारी सात-आठ तास वीज खंडित होत आहे.पाऊस असेल तर वीज खंडित होणे वीज ग्राहक समजू शकतात. मात्र पाऊस नसतांना देखील वीज पुरवठा का खंडीत होतो? अशा अनेक प्रश्नाची सरबत्ती राष्ट्रवादी कॉंग्रेसच्या पदाधिकाऱ्यांनी महावितरणच्या अधिकाऱ्यांवर केली.
महावितरण कंपनीने वीज ग्राहकांच्या उपस्थित आणि परवानगी शिवाय स्मार्ट मीटर बसवू नये.अन्यथा तीव्र आंदोलन छेडण्याचा ईशारा राष्ट्रवादी कॉंग्रेसच्या वतीने देण्यात आला आहे. यावेळी महावितरणच्या अधिकाऱ्यांनी आंदोलनकर्त्यांचे निवेदन स्वीकारून तात्काळ वरिष्ठ पातळीवर आणि मुख्य प्रशासन यांच्याशी चर्चा करून मार्ग काढण्याचे आश्वासन दिले. यावेळी राष्ट्रवादी काँग्रेस पक्षाचे पदाधिकारी, कर्मवीर शंकरराव काळे सहकारी साखर कारखाना व संलग्न संस्थांचे पदाधिकारी,आजी-माजी नगरसेवक, कार्यकर्ते आणि नागरिक मोठ्या संख्येने उपस्थित होते.