पशुधनासाठी चारा व पशुखाद्य अनुदान द्यावे; आ. विवेक कोल्हे यांची मुख्यमंत्री देवेंद्र फडणवीस यांच्याकडे मागणी
ट्रिगर दोन लागू केल्यामुळे कोपरगाव तालुक्यातील अधिक नागरिकांना दुष्काळी सवलती मिळण्याचा मार्ग मोकळा : आ.विवेक कोल्हे
Kopargaon vijay kapse दि १४ ऑक्टोबर २०२६ –
महाराष्ट्र राज्यात पावसाचे प्रमाण कमी झाल्यामुळे निर्माण झालेल्या दुष्काळसदृश परिस्थितीच्या पार्श्वभूमीवर पशुधनासाठी चारा खरेदी, चारा उत्पादन आणि दुधाळ जनावरांच्या पशुखाद्य खरेदीसाठी पशुपालकांना शासकीय अनुदान मंजूर करावे, अशी मागणी आ.विवेक कोल्हे यांनी मुख्यमंत्री देवेंद्र फडणवीस यांच्याकडे निवेदनाद्वारे केली आहे.जाहिरात
आ.विवेक कोल्हे यांनी मुख्यमंत्री देवेंद्र फडणवीस यांच्याकडे दिलेल्या निवेदनात म्हटले आहे की,राज्यात पावसाचे प्रमाण कमी झाल्याने चारा पिकांची वाढ खुंटली असून, हिरव्या व वाळलेल्या चाऱ्याची टंचाई जाणवू लागली आहे. त्यामुळे शेतकरी आणि पशुपालकांसमोर जनावरांच्या चाऱ्याची व्यवस्था करण्याचे मोठे आर्थिक आव्हान निर्माण झाले आहे. अशा परिस्थितीत पशुपालकांना आर्थिक मदत मिळणे आवश्यक असल्याचे आमदार कोल्हे यांनी निवेदनात नमूद केले आहे.जाहिरात
राज्य शासनाने महाराष्ट्र वैरण विकास धोरण जाहीर केले असून, त्यासाठी ४९६ कोटी रुपयांची तरतूद केली आहे. या धोरणाच्या माध्यमातून राज्यातील दोन कोटी ७८ लाख पशुधनासाठी वर्षभर पुरेसा आणि पौष्टिक चारा उपलब्ध करून देण्याचे उद्दिष्ट आहे. मात्र, दुष्काळसदृश परिस्थितीमुळे सध्या पशुपालकांना जनावरांचे संगोपन करताना आर्थिक अडचणींचा सामना करावा लागत आहे.जाहिरात
शेतीला पूरक व्यवसाय म्हणून दुग्धव्यवसायावर अनेक शेतकरी आणि ग्रामीण कुटुंबांची उपजीविका अवलंबून आहे. चारा टंचाईमुळे जनावरांच्या संगोपनाचा खर्च वाढत असून, दूध उत्पादनात घट होण्याची तसेच पशुधनाच्या आरोग्यावर विपरीत परिणाम होण्याची शक्यता आहे.आर्थिक अडचणींमुळे पशुपालकांवर जनावरे विकण्याची वेळ येऊ नये, यासाठी शासनाने तातडीने ठोस उपाययोजना कराव्यात, अशी मागणी त्यांनी केली आहे.
दुष्काळसदृश परिस्थिती असलेल्या गावांतील पात्र पशुपालकांना जनावरांच्या संख्येनुसार चारा खरेदीसाठी थेट आर्थिक अनुदान द्यावे, आवश्यकतेनुसार तालुकानिहाय चारा डेपो सुरू करून माफक दरात चारा उपलब्ध करून द्यावा, तसेच गंभीर चारा टंचाई असलेल्या भागांत चारा छावण्या सुरू कराव्यात, अशी मागणी आमदार कोल्हे यांनी केली आहे. याशिवाय, दुधाळ जनावरांचे पोषण आणि आरोग्य टिकवून ठेवण्यासाठी पशुखाद्य खरेदीकरिता विशेष आर्थिक सहाय्य देण्याची मागणीही त्यांनी केली आहे.जाहिरात
पशुधन हा ग्रामीण अर्थव्यवस्थेचा महत्त्वाचा आधार असून, चारा टंचाईच्या काळात पशुपालकांना आर्थिक मदत मिळणे अत्यंत आवश्यक आहे. त्यामुळे राज्यातील पात्र पशुपालकांना चारा खरेदीसाठी विशेष अनुदान मंजूर करण्याबाबत शासनाने तातडीने निर्णय घ्यावा, अशी मागणी आ.विवेक कोल्हे यांनी मुख्यमंत्री देवेंद्र फडणवीस यांच्याकडे केली आहे.
कोपरगाव तालुक्यात ट्रिगर दोन लागू केल्यामुळे दुष्काळी सवलती शेतकरी आणि नागरिकांना अधिक प्रमाणात मिळतील त्याबद्दल महाराष्ट्र सरकार व मुख्यमंत्री देवेंद्र फडणवीस यांचे आ.विवेक कोल्हे यांनी धन्यवाद व्यक्त केले आहे.
