के.बी.पी. विद्यालयातील विद्यार्थ्यांना आपत्ती व्यवस्थापनाचे प्रात्यक्षिक व मार्गदर्शन शिबीर संपन्न
के.बी.पी. विद्यालयातील विद्यार्थ्यांना आपत्ती व्यवस्थापनाचे प्रात्यक्षिक व मार्गदर्शन शिबीर संपन्न
कोपरगाव विजय कापसे दि १५ जुलै २०२४- भूतलावर वेगवेगळ्या नैसर्गिक आपत्ती नेहमीच येत असतात या आपत्ती मधून मार्ग काढण्यासाठी किंवा सुरक्षितता बाळगण्यासाठी काय काय उपाययोजना अथवा काळजी घ्यावी या विषयी कोपरगाव येथील कर्मवीर भाऊराव पाटील माध्यमिक व तांत्रिक विद्यालयामध्ये विद्यार्थ्यांना आपत्ती व्यवस्थापना संबंधीचे प्रात्यक्षिक व मार्गदर्शन शिबीर संपन्न झाले.
या प्रसंगी कोपरगाव नगरपालिकेचे अग्निशमन विभागाचे कर्मचारी सागर काटे, प्रमोद सिनगर, प्रशांत शिंदे, धनंजय सिनगर यांनी शालेय विद्यार्थ्यांना भूकंप, महापूर, आग लागणे अशा विविध आपत्तीवेळी स्वतःचा बचाव कसा करावा यासंबंधीचे मार्गदर्शन करत आपत्ती व्यवस्थापनासाठी वापरण्यात येणारे अग्निशमन वाहन, फोम टेंडर, लाइफ रिंग, लाईफ जॅकेट, अग्निशामक नळकांडे, बकेट, शावेल, फोर्स पाईप, हॅंडकटर, रोप लाईन, फायरमन सूट, लेडर अशा विविध साधनांचा वापर कसा करावा यासंबंधीचे प्रात्यक्षिक विद्यार्थ्यांना दाखविण्यात आले.