कोपरगाव गोळीबार घटनेत आमदार व स्वीय्य सहाय्यकांवरिल आरोपांची सखोल चौकशी होणार

कोपरगाव विजय कापसे दि २ ऑक्टोबर २०२४– कोपरगांव शहरातील अवैध व्यवसाय त्वरीत बंद व्हावे. तसेच १९ सप्टेंबर २०२४ रोजी शहरात झालेल्या गोळीबारातील जखमी इसमाने आमदार काळे व त्यांचे स्विय्य सहाय्यक जोशी यांचे नाव घेतले होते त्याबद्दल सखोल चौकशी व्हावी यासाठी दत्ता काले,विजय आढाव,बबलू वाणी,विनोद राक्षे,संदीप देवकर यांनी आमरण उपोषण पुकारले होते.गांधी जयंतीच्या निमत्ताने छत्रपती शिवाजी महाराज स्मारकासमोर अन्नत्याग करत मागण्या मान्य करण्याची मागणी पोलीस प्रशासनाकडे केली. यावेळी डीवायएसपी शिरीष वमने,युवानेते विवेकभैय्या कोल्हे,पोलीस निरीक्षक भगवान मथुरे यांनी उपोषणकर्त्यांचे म्हणणे जाणून घेत मागणीनुसार गोळीबार घटनेतील आमदार व त्यांचे स्विय्य सहाय्यकांवर झालेल्या आरोपांची सखोल चौकशी व अवैध धंदे बंद होण्यासाठी कार्यवाही करू असे सूचित केल्यानंतर उपोषण सोडण्यात आले.

सध्या सुरू असलेले चक्री, बिंगो, गांजा विक्री, कुत्ता गोळी, रेशन काळा बाजार आणि अवैध शस्त्र कारखाना असे अनेक अवैध व्यवसाय शहरात वाढले आहे. त्यातूनच व्यसनाधिनता वाढत चालली आहे. व्यसनामुळे टोकाची गुन्हेगारी फोफावली असुन खुन,मारामाऱ्या,चोऱ्या,महिला छेडछाड हे प्रकार देखील वाढीस लागत आहे. वाढत्या गुन्हेगारीमुळे सामान्य नागरिक दहशतीमध्ये असून भीतीचे वातावरण अनेकांमध्ये असल्याच्या नागरिकांमधून भावना व्यक्त झाल्या.

भयावह दहशतीमुळे कोपरगांव शहराच्या बाजारपेठेवर विपरीत परिणाम होत आहे.सोने चोरीसारखे अनेक गुन्हे अलीकडच्या काळात घडले व पुरावे असून त्याचा छडा अद्याप लागला नाही.अल्पवयीन युवक व्यसन आणि गुन्हेगारीकडे मोठ्या संख्येने वळले असून यामागे राजकीय वरदस्ताने अवैध व्यवसाय सुरू असल्याचे समोर येत आहेत अशी भूमिका कोल्हे कारखान्याचे अध्यक्ष युवानेते विवेकभैय्या कोल्हे यांनी व्यक्त केली. वेळीच वाढती गुन्हेगारी रोखली जावी. आपल्या शहराचे आणि तालुक्याची ही संस्कृती नाही मात्र राजकीय आश्रयामुळे असे प्रकार दिवसेंदिवस वाढीस लागले आहे. एक गावठी कट्टा दोन अलीकडे दिवसात सापडला,विविध ठिकाणी खून,मारामाऱ्या,दरोडे,छेडछाड असे प्रकार दिवसेंदिवस समोर येत आहे. गोळीबार प्रकरणातील जखमी व्यक्तीने आरोप केलेल्या व्हिडिओतील नावांची चौकशी होऊन त्यांचे फोन कॉल डिटेल्स सी डी आर तपासून चौकशी होण्याची जी मागणी उपोषणकर्त्यांनी केली आहे त्याची पोलीस प्रशासनाने दखल घ्यावी. आम्ही घटना घडल्या बरोबर आपल्याला निवेदन दिले आहे त्याला दहा दिवस उलटून जाऊन अद्यापही सर्व नावांची चौकशी झालेली नाही अशी भावना नागरिकांची असल्याने पोलिसांनी कुठल्याही दबावात न येता निपक्षपणे या घटनेचा सखोल तपास करावा असेही कोल्हे म्हणाले.