बेशिस्त वाहन चालकावर शहर पोलिसांची कारवाई; तर न्यायालयाने सुनावला त्यांना २१ हजाराचा दंड

सविस्तर वृत्त असे की, दि १४ मार्च  रोजी होळी व धुलीवंदनाच्या पार्श्वभूमीवर अपघातास कारणीभूत ठरणाऱ्या बेशिस्त वाहन चालकावर कारवाईसाठी शहर पोलीस निरीक्षक भगवान मथुरे व त्यांच्या पोलीस व होमगार्ड पथकाने शहरातील डॉ.बाबासाहेब आंबेडकर स्मारकाजवळ अचानकपणे वाहनांची तपासणी मोहीम राबवली असता या कारवाईत दारू पिऊन वाहन चालवताना ८ चालक सापडून आले असता त्या सर्वांची वैद्यकीय तपासणी करत त्यांच्या विरोधात मोटार वाहन कायदा कलम १८५ अन्वये मा. न्यायालयाने त्यांना दोषी  ठरवत प्रत्येकी २ हजार रुपये दंड ठोठावला आहे तर बेकायदेशीरपणे प्रवासी वाहतूक करताना मिळून आलेल्या एका वाहन चालकाविरुद्ध मोटार वाहन  कायदा कलम ६६ (१) /१९२ प्रमाणे मा. न्यायालयाने दोषी ठरवत ३ हजार रुपये दंडाची शिक्षा सुनावली आहे.

तसेच रहदारीस अडथळा करणाऱ्या २ इसमांना भारतीय न्याय संहिता कलम २८५ अन्वये प्रत्येकी ५०० रुपये दंडाची शिक्षा सुनावली आहे तर भारतीय न्याय संहिता कायदा कलम १२५ प्रमाणे धोकादायकरित्या वाहन  चालवल्याबाबत एका इसमास दोषी ठरवून मा.न्यायालयाने त्यास एक हजार रुपये दंडाची शिक्षा सुनावली आहे असे एकूण बेकायदेशीर रित्या १२ वाहन चालकांविरुद्ध कोपरगाव शहर पोलिसांनी कारवाई करत न्यायालयाने त्यांना तब्बल २१ हजार रुपये दंडाची शिक्षा सुनावली आहे.

सदरची कौतुकास्पद कारवाई करणाऱ्या कोपरगाव शहर पोलीस स्टेशनचे पोलीस हेडकॉन्स्टेबल दिगंबर शेलार, पोलीस हेडकॉन्स्टेबल एकनाथ लिंबोरे, पोलीस कॉन्स्टेबल समाधान वर्पे, होमगार्ड पुंडलिक जोरावर, होमगार्ड अमोल शिंदे, होमगार्ड गणेश लकारे आदींचे उपविभागीय पोलीस अधिकारी शिरीष वमने व कोपरगाव शहर पोलीस निरीक्षक भगवान मथुरे यांनी कौतुक केले आहे.