पोहेगांव परिसरात रात्रीची गस्त वाढवुन नागरिकांना दिलासा द्यावा- जिल्हाप्रमुख औताडे

कोपरगाव विजय कापसे दि ९ सप्टेंबर २०२५– पोहेगांव पूर्वी शिर्डी पोलीस स्टेशनच्या हद्दीत येत होते. या पोलीस स्टेशनवर व्हीआयपी यांची अतिरिक्त जबाबदारी व दररोजची वाढती गुन्हेगारी यामुळे पोलीसांवर ताण पडायचा. पोहेगांवला पोलीस दुरुक्षेत्र असताना देखील पोलीस यंत्रणेअभावी कामकाज होत नव्हते. सरकार दरबारी गेल्या अनेक वर्षापासून मागणी होती की पोहेगाव कोपरगाव ग्रामीण पोलीस स्टेशनला जोडण्यात यावे. यासाठी ग्रामपंचायतीच्या वतीने वेळोवेळी पाठपुरावा केला होता. याची दखल घेत आता पोहेगांव कोपरगाव ग्रामीण पोलीस स्टेशनला जोडले आहे. यामुळे नागरिक समाधानी झाले मात्र कोपरगाव तालुका पोलीस स्टेशनने पोहेगांव परिसरात रात्रीची गस्त वाढवुन नागरिकांना दिलासा दिला पाहिजे व पोहेगांव पोलीस दूरक्षेत्र सुरू करण्यासंदर्भात तातडीने निर्णय घेतले पाहिजे असे प्रतिपादन शिवसेना जिल्हाप्रमुख नितीनराव औताडे यांनी केले. पोहेगाव ग्रामपंचायत कार्यालयास पोलीस निरीक्षक संदीप कोळी यांनी मंगळवार (दि ९)  भेट दिली असता त्यांना पोहेगावचा भौगोलिक आराखडा विषयी माहिती देताना बोलत होते.