कर्मवीर शंकररावजी काळे यांच्या १४ व्या पुण्यस्मरणा निमित्त शनिवारपासून तीन दिवस ‘कर्मवीर कृषी महोत्सव’

कर्मवीर शंकररावजी काळे यांनी शेतकरी, शेतमजूर, कष्टकरी आणि ग्रामीण भागातील विद्यार्थ्यांच्या उन्नतीला आपल्या कार्याचा केंद्रबिंदू मानले होते. सहकाराच्या माध्यमातून ग्रामीण अर्थव्यवस्थेला बळकटी देतानाच शिक्षणाच्या सुविधा उपलब्ध करून देणे, शेतीला सिंचनाची जोड देणे त्यासाठी गोदावरी नदीवर कोल्हापूर टाईप बंधाऱ्यांची निर्मिती करून गौतम बंधारे उभारण्याचे महत्वपूर्ण काम करून सर्वसामान्यांच्या जीवनमानात सकारात्मक बदल घडवून आणण्यासाठी त्यांनी आयुष्यभर प्रयत्न केले. त्यांच्या या लोकाभिमुख कार्याचा गौरव आणि आधुनिक कृषी तंत्रज्ञानाची माहिती शेतकऱ्यांपर्यंत पोहोचविण्याच्या उद्देशाने या भव्य-दिव्य कर्मवीर कृषी महोत्सवाचे आयोजन करण्यात आले आहे.

या महोत्सवाचे उद्घाटन शनिवार (दि.२१) रोजी सकाळी ११ वाजता कर्मवीर शंकरराव काळे सहकारी साखर कारखाना व उद्योग समूहाचे मार्गदर्शक माजी आमदार अशोकराव काळे यांच्या अध्यक्षतेखाली व आमदार आशुतोष काळे यांच्या प्रमुख उपस्थितीत राज्याचे माजी साखर आयुक्त शेखर गायकवाड यांच्या हस्ते होणार आहेत. महोत्सवाच्या पहिल्याच दिवशी म्हणजेच शनिवार (दि.२१) रोजी दुपारी १२ ते सायंकाळी ५ या वेळेत एस.जे.एस. हॉस्पिटल, कोपरगाव यांच्या सहकार्याने तज्ज्ञ डॉक्टरांच्या उपस्थितीत मोफत सर्वरोग निदान शिबिर आयोजित करण्यात आले आहे. यामध्ये हृदयविकार, मेंदूविकार,मधुमेह,दमा,श्वसनविकार, शरीरावरील गाठी व गोळे, मूत्ररोग, पित्ताशयातील खडे, पोटाचे विकार, कान-नाक-घसा, नेत्रविकार, अस्थिरोग, स्त्रीरोग आणि त्वचारोग यांची तपासणी व निदान करण्यात येणार आहे. रविवार (दि.२२) रोजी सकाळी ११ वाजता ‘क्षारपड जमीन सुधारणा व उत्पादनवाढ’ या विषयावर परभणीच्या वसंतराव नाईक मराठवाडा कृषी विद्यापीठाचे मृदाविभाग प्रमुख डॉ.हरिहर कौसाडीकर यांचे चर्चा सत्र होणार असून ते शेतकऱ्यांना मार्गदर्शन करणार आहेत. तर सोमवार (दि.२३) रोजी सकाळी ११ वाजता ‘दुधाळ जनावरांचे प्रजनन व आरोग्य व्यवस्थापन’ या विषयावर परभणी, पशुवैद्यकीय महाविद्यालयाचे माजी अधिष्ठाता डॉ. नितीन मार्कंडेय हे दुध उत्पादक शेतकऱ्यांना मार्गदर्शन करणार असल्याचे कर्मवीर शंकरराव काळे मित्रमंडळाचे अध्यक्ष कारभारी आगवण यांनी सांगितले आहे.

शेतीतील समस्या, जमिनीचा पोत सुधारणे, उत्पादनवाढ आणि पशुधनाचे आरोग्य यांसारख्या महत्त्वाच्या विषयांवर तज्ज्ञांकडून थेट मार्गदर्शन मिळणार असल्याने हा उपक्रम शेतकऱ्यांसाठी अतिशय उपयुक्त आहे.कृषी महोत्सवातील प्रदर्शनात आधुनिक शेती तंत्रज्ञान, विविध कृषी अवजारे, यंत्रसामग्री, कृषी निविष्ठा, आधुनिक सिंचन पद्धती, शेतीसाठी लागणारी उपकरणे आणि नवनवीन कृषी तंत्रज्ञानाची माहिती तसेच बदलत्या शेती पद्धतीनुसार कमी खर्चात अधिक उत्पादन कसे घेता येईल,उपलब्ध साधनसामग्रीचा प्रभावी वापर कसा करावा आणि शेती अधिक फायदेशीर कशी बनवावी, याबाबत शेतकऱ्यांना सविस्तर माहिती मिळणार आहे. विशेष म्हणजे, महोत्सवाला भेट देणाऱ्या नागरिकांसाठी ‘लकी ड्रॉ’ चे आयोजन करण्यात आले असून त्यामध्ये ई-स्कूटरसह अनेक आकर्षक बक्षिसे जिंकण्याची संधी उपलब्ध करून देण्यात आली आहे. कृषी क्षेत्रातील नवनवीन तंत्रज्ञानाची माहिती, तज्ज्ञांचे मार्गदर्शन आणि विविध उपक्रमांचा लाभ एकाच ठिकाणी मिळणार असल्याने शेतकरी, पशुपालक, कृषीप्रेमी तसेच नागरिकांनी मोठ्या संख्येने उपस्थित राहून ‘कर्मवीर कृषी महोत्सवा’चा लाभ घ्यावा, असे आवाहन कर्मवीर शंकरराव काळे मित्रमंडळाचे उपाध्यक्ष नारायणराव मांजरे यांनी केले आहे.