बेशिस्त वाहन धारकांवर शहर पोलिसांची धडाकेबाज कारवाई; २५ हजार ५०० रुपये दंड वसूल 

कोपरगाव विजय कापसे दि १३ जुन २०२५– संपूर्ण अहिल्यानगर जिल्ह्यात अत्यंत संवेदनशील समजल्या जाणाऱ्या कोपरगाव शहराचा पोलीस निरीक्षक पदाचा पदभार गुरुवार दि १२ जून रोजी रामकृष्ण कुंभार यांनी स्वीकारताच पहिल्याच दिवशी सांगितल्याप्रमाणे अवैध धंद्याविरुद्ध तसेच बेशिस्त वाहन धारकांविरुद्ध आपल्या कारवाईचा बडगा उगारात पहिल्याच दिवशी शहरात आपल्या शिस्तीच्या कामाचा ठसा उमटवल्याने शहरवासीयांनी समाधान व्यक्त केले आहे तर अवैध धंदे वाल्यांच्या मनात धडकी उभी राहिली आहे.

पोलीस निरीक्षक रामकृष्ण कुंभार यांनी आपल्या कामाचा पदभार स्वीकारताच शहरातील गांधीनगर परिसरातील जुगार आड्ड्यावर तसेच टाकळी गावात गावठी हातभट्टीवर छापा टाकत कामाला सुरुवात करत शुक्रवारी दि १३ जून रोजी सकाळी कोपरगाव शहरातील भारतरत्न डॉ. बाबासाहेब आंबेडकर पुतळ्याजवळ नाकाबंदी करत तब्बल ५१ बेशिस्त वाहन चालकांवर कारवाई करत २५ हजार ५०० रुपयेचा दंड वसूल केला आहे.

या कारवाईमध्ये विना लायसन्स वाहन चालवणाऱ्या २८ वहान चालकाकडून १४ हजार रुपयांचा दंड, फॅन्सी नंबर प्लेट वापरणाऱ्या १ वाहन चालकाकडून १ हजार रुपयाचा दंड, ट्रिपल सीट वाहन चालवणाऱ्या २ वाहन चालकांकडून २ हजार रुपयाचा दंड, कर्णकर्कश हॉर्न वाजवणाऱ्या एका वाहन चालकांकडून ५०० रुपयेचा दंड तर वाहनांच्या क्षमतेपेक्षा जास्त व्यक्ती घेऊन जाणाऱ्या ५ वाहन चालकांकडून १ हजार रुपयेचा दंड असा ५१ वहानचालकांकडून तब्बल २५ हजार ५०० रुपयेचा दंड वसूल केल्याने वाहन चालकांना इथून पुढे कोपरगाव शहरात येताना वाहतुकीच्या सर्व नियमांचे पालन करूनच  यावे लागेल.