डॉ. जयश्री थोरात यांच्या पुढाकारातून आदिवासी चिमुकल्यांना मायेची ऊब

एकविरा फाउंडेशन व बीएसटी आर्मीच्या वतीने ३०० विद्यार्थ्यांना उबदार स्वेटरचे वाटप

Sangmner vijay kapse दि ३० ऑक्टोबर २०२६ : समाजातील गोरगरीब, वंचित आणि दुर्बल घटकांच्या जीवनात आनंद निर्माण करण्याच्या सामाजिक बांधिलकीतून लोकनेते बाळासाहेब थोरात यांनी जपलेली सेवेची परंपरा डॉ. जयश्री थोरात पुढे नेत आहेत. याच भावनेतून त्यांच्या पुढाकाराने एकविरा फाउंडेशन आणि बीएसटी आर्मी यांच्या संयुक्त विद्यमाने संगमनेर तालुक्यातील आदिवासी व मागासवर्गीय वस्त्यांमधील जिल्हा परिषद शाळांतील ३०० विद्यार्थ्यांना उबदार स्वेटरचे वाटप करण्यात आले. थंडीच्या दिवसांत स्वेटरच्या माध्यमातून मिळालेल्या मायेच्या उबेमुळे चिमुकल्या विद्यार्थ्यांच्या चेहऱ्यावर आनंद फुलला.

संगमनेर तालुक्यातील चंदनापुरी येथील आनंदवाडी, जावळे वस्ती, ठाकरवाडी, सावरगाव तळ येथील गाडेवस्ती, सतीची वाडी, डोळासणे येथील डुबे वाडी, खैरेदरा आणि गिरेवाडी या ठिकाणी हा उपक्रम राबविण्यात आला. एकविरा फाउंडेशन तसेच विदेशात कार्यरत असलेल्या बीएसटी आर्मीच्या सदस्यांच्या सहकार्याने विद्यार्थ्यांना स्वेटरचे वाटप करण्यात आले.

यावेळी आदिवासी सेवक प्रा. बाबा खरात, तालुकाध्यक्ष बाळकृष्ण गांडाळ, यशोधन कार्यालयातील शर्मिला हांडे, ज्योती थोरात, श्रद्धा कढणे, वंदना राहणे, उज्ज्वला राहणे, प्राजक्ता घुले, वंदना शर्माळे, हर्षल काकड यांच्यासह स्थानिक पदाधिकारी, शिक्षक, पालक व नागरिक उपस्थित होते.

माजी मंत्री बाळासाहेब थोरात यांच्या मार्गदर्शनाखाली एकविरा फाउंडेशनच्या माध्यमातून महिला सबलीकरणासह विविध सामाजिक उपक्रम सातत्याने राबविले जातात. समाजातील वंचित घटकांना मदतीचा हात देणे, विद्यार्थ्यांना शिक्षणासाठी प्रोत्साहन देणे आणि त्यांच्या चेहऱ्यावर आनंद फुलविणे हा या उपक्रमांचा मुख्य उद्देश आहे. याच सामाजिक बांधिलकीतून बीएसटी आर्मीच्या सहकार्याने विद्यार्थ्यांना स्वेटर वाटपाचा उपक्रम आयोजित करण्यात आला. नवीन स्वेटर मिळाल्यानंतर विद्यार्थ्यांच्या चेहऱ्यावर उमटलेले हास्य आणि डोळ्यांतील आनंद हेच या उपक्रमाचे खरे फलित ठरले.

यावेळी बोलताना आदिवासी सेवक प्रा. बाबा खरात म्हणाले की, सहकार महर्षी भाऊसाहेब थोरात यांनी घालून दिलेले सामाजिक सेवेचे संस्कार लोकनेते बाळासाहेब थोरात यांनी जपले आहेत. त्याच विचारांचा वारसा डॉ. जयश्रीताई थोरात पुढे नेत असून त्या गोरगरीब आणि आदिवासी समाजाच्या सेवेसाठी सातत्याने कार्यरत आहेत. चिमुकल्या विद्यार्थ्यांच्या चेहऱ्यावर फुललेले हास्य हे कोणत्याही पैशात मोजता येणार नाही. शिक्षणाच्या माध्यमातूनच आदिवासी आणि गोरगरीब समाजाची प्रगती शक्य आहे. अशा उपक्रमांमुळे विद्यार्थ्यांना प्रोत्साहन मिळते आणि समाजात खऱ्या अर्थाने आनंद निर्माण होतो. हा अत्यंत पुण्याचा उपक्रम असल्याचे त्यांनी सांगितले.

बाळकृष्ण गांडाळ म्हणाले की, आदिवासी आणि गोरगरीब समाजातील नागरिकांनी कायमच लोकनेते बाळासाहेब थोरात यांच्या नेतृत्वावर विश्वास आणि प्रेम व्यक्त केले आहे. त्यांनीही आपल्या कार्यातून सर्वसामान्यांच्या विकासाला प्राधान्य दिले आहे. गोरगरीब जनतेच्या प्रश्नांना न्याय देणारे हक्काचे नेतृत्व म्हणून बाळासाहेब थोरात यांच्याकडे पाहिले जाते. यशोधन कार्यालयाच्या माध्यमातूनही सर्वसामान्यांच्या जीवनात आनंद निर्माण करण्यासाठी सातत्याने विविध सामाजिक उपक्रम राबविले जात असल्याचे त्यांनी नमूद केले.

कार्यक्रमाचे प्रास्ताविक शर्मिला हांडे यांनी केले, तर ज्योती थोरात यांनी उपस्थितांचे आभार मानले. यावेळी संबंधित शाळांचे मुख्याध्यापक, शिक्षक, पालक आणि स्थानिक नागरिक मोठ्या संख्येने उपस्थित होते.