चाळीस वर्षांची परंपरा आणि प्रगती आमदारांना तीन महिने ही सांभाळता आली नाही- शहर काँग्रेस अध्यक्ष सोमेश्वर दिवटे

संगमनेर मध्ये विजेचा प्रश्न गंभीर झाला आहे. जिथे पूर्वी बारा तास पूर्ण दाबाने लाईट मिळायची तिथे अवघी चार-पाच तास लाईट मिळते. रोहित्र वेळेवर मिळत नाही, पाणी वाहून चालले आहे. या सर्व गोष्टींना फक्त आणि फक्त आमदारांचा नाकारतेपणाच कारणीभूत आहे. आमदारांना संगमनेर तालुक्याशी काहीही घेणे देणे नाही पालकमंत्री सांगतील तसे ते वागत आहेत. दादागिरी आणि दमदाटी करून चुकीचे राजकारण करण्याचा प्रयत्न त्यांचा आणि त्यांच्या पिलावळीचा आहे. आढावा बैठकांमध्ये मुळात जनतेचे प्रश्न सोडवायचे असतात त्याला गती द्यायची असते चालू असलेली कामे बंद करायची नसतात. मात्र टक्केवारीच्या आशेने थेट पालकमंत्र्यांना बोलवून खंडणी वसुलीचा कार्यक्रम झाल्याचे आमचे स्पष्ट मत आहे. आढावा बैठक म्हणजे अधिकाऱ्यांवर दादागिरी करून खंडणी उकळण्याचा अत्यंत घुणस्पद प्रकार होता. अनेक अधिकारी खाजगीत संगमनेर तालुक्यात वाढलेली टक्केवारी, खंडणी आणि दादागिरी याबद्दल चिंता व्यक्त करत आहेत. चुकीच्या प्रवृत्ती आणि चुकीची माणसं सांभाळून संगमनेर तालुक्याचे नाव बदनाम करण्याचा घाट घातला जातो आहे. हे सर्व पालकमंत्र्यांच्या आशीर्वादाने आणि आमदारांच्या सहमतीने सुरू आहे, असाही घनाघाती आरोप दिवटे यांनी केला.

पालकमंत्र्यांनी संगमनेर मध्ये येऊन आढावा बैठक घेतली, ही काही संगमनेरच्या विकास कामांचा आढावा घेण्यासाठी घेतलेली बैठक नव्हती. महायुतीच्या पदाधिकाऱ्यांची राजकीय बैठक होती, संगमनेर मध्ये सुरू असलेली विकास कामे बंद पाडण्यासाठी घेतलेली बैठक होती. विधानसभेची निवडणूक झाल्यानंतर नाशिक पुणे रेल्वे चा मार्ग बदलतोच कसा? आमदार खतांनी पालकमंत्र्यांना हे भर बैठकीत विचारायला पाहिजे होते. संगमनेर करांना न विचारता अप्पर तहसील कार्यालय निर्माण करण्याचे षडयंत्र कोणाच्या सांगण्यावरून झाले? आमदारांनी हा प्रश्न सुद्धा पालकमंत्र्यांना विचारायला हवा होता. नदीतून पाणी वाहून चालले आहे, पूर्ण दाबाने वीज मिळत नाही, यासाठी काय उपाययोजना करणार? याचा आराखडा आमदारांनी द्यायला पाहिजे होता. या उलट जलजीवांची चालू असलेली कामे बंद पाडणे, कंत्राटदारांना चकरा मारायला लावणे असलेच उद्योग सुरू झाले आहेत. ज्यांचा मूळ पिंड खंडणीचा आहे, या अगोदरही ज्यांनी फक्त लोणीचा खबऱ्या म्हणून काम केले आहे त्यांच्याकडून तशी फार अपेक्षा नाही. मात्र आता तुम्ही आमदार झालेले आहात वागताना आणि बोलताना भान बाळगायला हवे असाही सल्ला, दिवटे यांनी दिला.